Стјуардеса од Белград тешко повредена во авионската несреќа во Торонто
18/02/2025 17:07
Стјуардесата Вања Виќентијевиќ (32) од Белград се наоѓала во авионот на американската авио-компанија „Делта ерлајнс“, кој се преврте при слетувањето на меѓународниот аеродром „Пирсон“ во Торонто.
Во несреќата Вања е тешко повредена и се бори за живот, според последните информации.
Семејството на Вања е многу загрижено, но засега знаат само дека таа е хоспитализирана и во критична состојба, со тоа што лекарите се борат за нејзиниот живот.
Според нивните информации, Вања била стјуардеса на летот 4819 и се здобила со сериозни повреди при слетувањето во Торонто.
„При превртувањето на авионот, реброто ја прободе белодробното ткиво, а сега е во медицински шок и не е свесна. Состојбата е многу сериозна и се бори за живот. Ова е сè што ни кажаа од болницата, друго не знаеме“, изјавила за српскиот „Блиц“ нејзината братучетка Мирјана Дориќ.
Вања, родена во Сопот, е на лекување во болница, а семејството добило барање да испрати некој за да добие повеќе детали. Сепак, не можат да ја посетат, бидејќи посетите се забранети. „Ништо повеќе не слушнавме од медиумите. Семејството е во очај, се надеваме на најдобро и дека ќе преживее. Тоа ни останува како последна надеж“, изјавила Мирјана.
Шефот на аеродромот во Торонто, Тод Ајткин, изјави дека 18 патници кои се здобиле со повреди биле пренесени во локални болници. Истрагата за несреќата продолжува, а Ајткин нагласи дека пистата, на која слетал авионот, била сува и дека немало страничен ветер во моментот на инцидентот.
Медиумите претходно известија дека тројца патници, вклучувајќи и едно дете, се тешко повредени. Патниците кои успеале да го напуштат авионот раскажале за ужасот што го доживеале.
