Христијаните го одбележуваат Велики петок – ден на Христовите страдања
18/04/2025 9:56
Денеска христијаните ширум светот го одбележуваат Велики петок, еден од најтажните денови во христијанскиот календар, денот кога, според верувањето, бил распнат Исус Христос.
Познат и како Распет петок, овој ден се одбележува со строги богослужби, читања од Евангелието и обреди кои го симболизираат страдањето, смртта и погребението на Христос. Вечерната служба вклучува изнесување на покривката – платно со везени сцени од страдањето на Исус – кое верниците го целиваат и со кое трипати се обиколува црквата.
Во православната традиција, на Велики петок се практикува најстрог пост – без храна и вода до зајдисонце, освен за болните и постарите. Обичај е и вапсување на велигденски јајца во црвена боја, како симбол на пролеаната Христова крв.
Црквата потсетува дека страдањето и смртта на Исус се претходница на неговото воскресение, што ќе биде одбележано на Велигден, најголемиот христијански празник.
