Променливо и нестабилно време со пороен дожд и грмежи – следува стабилизација од вторник
27/04/2025 9:24
Времето денеска во земјава ќе биде променливо облачно и нестабилно, со повремени локални врнежи од дожд проследени со грмежи. На одредени места се очекуваат поинтензивни атмосферски процеси во форма на невреме – со пороен дожд, електрични празнења, засилен ветер, а локално постојат услови и за краткотрајна појава на град.
Во Скопската Котлина попладневните часови ќе донесат нестабилност, со појава на пороен дожд и грмежи. Можно е и појавување на засилен ветер и изолирани врнежи од град.
Утрешниот ден ќе донесе променливо облачно и посвежо време, со повремени локални врнежи претежно во западниот дел од земјата. Ќе дува слаб до умерен ветер од источен правец. Минималните утрински температури ќе се движат меѓу 5 и 11 °C, додека дневните ќе достигнат од 15 до 22 °C.
Од вторник метеоролозите најавуваат стабилизирање на времето. Ќе преовладува сончево време со мала локална облачност, а дневните температури ќе бидат во пораст и ќе се движат од 18 до 25 степени Целзиусови.
