ПАПАТА ЛАВ УПАТИ АПЕЛ ЗА ИТЕН ПРЕКИН НА ОГНОТ ВО ГАЗА И ЈА ПОВИКА МЕЃУНАРОДНАТА ЗАЕДНИЦА
20/07/2025 21:18
Папата Лав XIV во своето неделно обраќање повторно упати апел за итен прекин на огнот во Газа, повикувајќи ја меѓународната заедница да ги почитува меѓународните закони и да ги исполнува своите обврски за заштита на цивилното население, пренесе агенцијата Анадолу.
Во говорот што го одржа од својата летна резиденција во Кастел Гандолфо, близу Рим, папата се осврна на израелскиот воздушен напад од 17 јули врз католичката црква на Светото семејство во Газа, во кој загинаа три лица.
„Сè уште пристигнуваат потресни вести од Блискиот Исток, особено од Газа. Со голема тага ја примив информацијата за нападот на израелската армија врз католичката црква во Газа“, рече тој, изразувајќи сочувство со локалната католичка заедница.
Тој истакна дека овој напад само ја засилува загриженоста за постојаното насилство врз цивили и верски објекти во појасот Газа.
„Повторно повикувам на итен прекин на воените злосторства и итно барање мирно решение за конфликтот“, рече папата Лав.
Обраќајќи се до меѓународната заедница, папата апелираше за строго придржување до хуманитарното право и заштита на цивилите, осудувајќи колективно казнување, неселективна употреба на сила и присилно иселување.
На новинарско прашање во врска со неговата комуникација со израелскиот премиер Бенјамин Нетанјаху, папата потврди дека имале разговор.
„Да, разговаравме. Ја нагласив важноста од заштита на светите места на сите религии и потребата за заемно почитување, за соработка, и надминување на насилството и омразата“, изјави тој.
Во завршницата, папата подвлече дека човештвото не смее да дозволи нови војни, повикувајќи на оставување на оружјето и градење дијалог.
Папата Лав XIV во своето неделно обраќање повторно упати апел за итен прекин на огнот во Газа, повикувајќи ја меѓународната заедница да ги почитува меѓународните закони и да ги исполнува своите обврски за заштита на цивилното население, пренесе агенцијата Анадолу.
