Крива Паланка повторно на црната мапа: втор монструозен напад врз куче!
14/08/2025 18:08
Уште еден потресен случај на брутално малтретирање на домашно милениче ја шокира Крива Паланка, град кој за кратко време стана синоним за суровост кон животните. Ова е веќе втор инцидент во истиот град, и тоа во период од само неколку месеци!
И овојпат, куче било врзано за автомобил, влечено по патот и потоа фрлено во коритото на Крива Река. Фотографии од ужасната сцена, направени од случајни минувачи, експлозивно се проширија по социјалните мрежи, предизвикувајќи лавина од гнев и осуда. На нив јасно се гледаат крвавите рани на беспомошното животно.
Пожарникарите од Територијалната противпожарна единица реагирале веднаш по пријавата, извлекувајќи го кучето и предавајќи го на надлежните институции. Од МВР потврдија дека сторителот, 59-годишниот З.М. од Крива Паланка, бил веднаш идентификуван и повикан на службен разговор. По целосното документирање на случајот, ќе следува кривична пријава.
Од здружението „Анима Мунди“ остро реагираат, нагласувајќи дека институциите мора конечно да почнат со сериозно санкционирање на ваквите дела. Благодарение на брзата реакција на граѓаните и пожарникарите, кучето е спасено, згрижено и моментално се наоѓа во стабилна состојба.
Се потсетуваме – неодамна во Македонија беше изречена првата затворска казна за убиство на куче, но очигледно, суровоста не запира. Дали Крива Паланка ќе стане симбол на нечовечноста или конечно на правдата – останува да видиме.
