ЦУК: Зголемени водостои по врнежите, 250 евакуирани во Кичево
20/02/2026 15:15
Центар за управување со кризи информира дека по врнежите од дожд и снег во изминатите 24 часа е забележано зголемување на водостоите на повеќе реки низ државата. Состојбата се следи континуирано, а надлежните служби постапуваат согласно проценките на терен.
Кумановски регион
На подрачјето на општините Куманово, Липково и Старо Нагоричане водостоите се покачени, но засега нема опасност од излевање. Во Општина Кратово, поради повремени врнежи од дожд, зголемено е нивото на Кратовска Река и Крива Река, без регистрирани излевања.
Пелагониски регион
Битола: Регистриран е одрон на магистралниот пат Е-65, за што е известено ЈП Македонијапат – Битола. Забележано е и излевање на Сива Река во близина на локалитетот Хераклеа, за што е известено ЈП „Нискоградба“-Битола.
Новаци: Нивото на Црна Река изнесува околу 280 сантиметри.
Демир Хисар: Зголемен е водостојот на реката Црна, без значителни излевања.
Охридско-кичевски регион
Кичево: Евидентирани се 250 евакуирани лица, односно 63 семејства, на кои им се обезбедува храна, вода и неопходна поддршка.
Екипи на комуналните служби работат на расчистување и продлабочување на коритото на Зајашка Река, како и на чистење на канализационата мрежа. Територијалната противпожарна единица врши испумпување вода од подруми на повеќе улици по пријави од жители.
Надлежните апелираат граѓаните да ги следат официјалните информации и да постапуваат согласно препораките на институциите.
