„Виз ер“ во хаос: лет за Крит заврши во Скопје, со 200 патници, а на аеродромот очекувале празен авион
30/08/2025 21:45
Летот на „Виз ер“ од Белград кон Крит, кој требаше да полета 15 минути по полноќ, се претвори во вистинска авионска драма. Наместо на грчкиот остров, околу 4 часот изутрина авионот неочекувано слета во Скопје, пренесува „Н1“.
Патниците сведочат дека никој не бил јасно информиран што се случува – наместо објаснување, на секој час добивале нови пораки со одложувања. Конечно, летот тргнал во 4:20 часот, но наместо на Крит, се приземјиле во главниот град на Македонија. „Во Скопје сите беа изненадени – и полицијата и аеродромските службеници, затоа што ‘Виз ер’ им пријавил празен авион, а од него излегоа околу 200 патници,“ изјави патничката Јелена.
Таа додава дека патниците биле задржани подолго во авионот без никакво објаснување, а една жена се почувствувала и лошо. „Пилотот кажа дека неговото работно време завршува и дека информации ќе добиеме на аеродромот. Но таму никој не знаеше ништо,“ вели таа.
Како причина за пренасочувањето било наведено дека белградскиот аеродром „не работи“ и дека авиони не слетуваат. Разочараните патници дури ја контактирале и српската амбасада, но од таму им било кажано дека не можат ништо да сторат.
Дури по инсистирање на патниците, аеродромот во Скопје обезбедил автобус за нивен транспорт до Белград. Настанот отвори сериозни сомнежи за односот на „Виз ер“ кон патниците, транспарентноста на информациите и професионалното управување со кризни ситуации.
