Најголемиот воен брод во светот USS Gerald R. Ford пристигна во Сплит

Најголемиот воен брод во светот, американскиот носач на авиони USS Gerald R. Ford (CVN 78), денес пристигна во хрватскиот град Сплит, во рамките на своето оперативно распоредување во Средоземното Море.

Ова е втора посета на овој носач на авиони на хрватските води — претходната се случи во 2023 година. Посетата е дел од мисијата на Шестата флота на САД, чија цел е да ја поддржи воената подготвеност, поморската безбедност и сојузничката стабилност во Европа и Африка, соопшти порталот Index.hr.

Најголем и најмодерен брод некогаш изграден

„USS Gerald R. Ford“, именуван по 38-от претседател на САД, е најголемиот и технолошки најнапреден воен брод во историјата.

• Должина: над 300 метри

• Висина: 76 метри

• Вкупно палуби: 25

• Екипаж: околу 4.500 лица

• Капацитет: до 75 авиони

Изградбата на овој гигант чини 12,8 милијарди долари, а дополнителни 4,7 милијарди долари се вложени во истражување и развој.

Иако е нешто пократок од „USS Enterprise“ (310 метри), „Gerald R. Ford“ има поголем депласман, поголем екипаж и најсовремени системи за навигација, енергија и вооружување, што го прави симбол на американската морнаричка супериорност.

Траењето на посетата

Хрватските власти сè уште немаат објавено до кога бродот ќе остане во територијалните води, но пристигнувањето предизвика голем интерес кај јавноста и туристите во Сплит.

Share on Facebook

Tweet

Follow us

Save