СУТКОЗ со закани и драматични тврдења. Дали синдикалниот притисок врз „Комунална хигиена“ станува политички инструмент?

Синдикатот на СУТКОЗ при ЈП „Комунална хигиена“ повторно излезе со драматична објава во јавноста, во која се обидува да ја прикаже состојбата во претпријатието како катастрофална, со задоцнети плати и нефункционална механизација. Но, ваквите тврдења сè повеќе личат на синдикално-политички притисок, отколку на реална слика од теренот.

Иако во соопштението се нагласува дека платите „си доцнат со месеци“, од претпријатието денеска појаснија дека станува збор за неколкудневно задоцнување кое е во рамките на законскиот рок, нешто што не е невообичаено во јавните претпријатија. Сепак, СУТКОЗ најавува кривични пријави, инспекциски постапки и други мерки, што создава впечаток на намерно драматизирање и поткопување на авторитетот на сегашното раководство.

Забележливо е и тоа што Синдикатот го користи секое минимално доцнење на плата како повод за јавни настапи и медиумски истапи, без да понуди конкретни решенија или да признае дека претпријатието функционира во сложени услови, со намалени ресурси и опрема која со години е занемарувана.

Парадоксално, токму додека СУТКОЗ зборува за „совесност“ и „редовно извршување на обврските“, дел од граѓаните секојдневно сведочат на неиспразнети контејнери и неефикасно собирање смет, што го става под прашање нивниот реален придонес во подобрувањето на состојбата.

Во јавноста расте впечатокот дека дел од синдикалното раководство повеќе се занимава со медиумски настапи и закани кон менаџментот, отколку со конструктивен дијалог и решенија за вистинските проблеми.

Share on Facebook

Tweet

Follow us

Save