Обвинителите бараат итна одлука од Уставен за платите: Предупредуваат на одлив на кадар и загрозување на обвинителството

Обвинителите бараат одлука за платите од Уставниот суд, откако повеќе од осум месеци нема конечна разрешница за иницијативите со кои се оспоруваат законските измени за намалување на коефициентите.

Советот на јавните обвинители, Јавното обвинителство и Здружението на јавните обвинители бараат иницијативите итно да бидат ставени на дневен ред.

Станува збор за одредби од законите за платите на јавните обвинители и членовите на Советот на јавните обвинители, со кои, според нив, по третпат биле намалени коефициентите за пресметка на платите.

Предупредуваат на загрозување на самостојноста

Од Здружението на јавните обвинители изразуваат сериозна загриженост поради непостапувањето на Уставниот суд.

Според нив, ваквата состојба ја доведува во прашање самостојноста на Јавното обвинителство и создава значителен диспаритет меѓу судската и јавнообвинителската функција.

Тие оценуваат дека тоа е спротивно на европските и меѓународните стандарди за владеење на правото.

Уставниот суд веќе изразил сомнеж

Обвинителите потсетуваат дека Уставниот суд претходно повел постапка за оценување на уставноста и законитоста на спорните решенија.

Во своето решение Судот навел дека законодавецот има право да ја уредува висината на платите.

Сепак, бил изразен сомнеж дека со намалувањето на коефициентите можеби е навлезено во уставно загарантираната независност и самостојност на Јавното обвинителство.

Судот го поставил и прашањето дали со ваквите измени се доведува во прашање правото на соодветна заработувачка.

„Несфатливо е натамошното одлагање“

Од обвинителската фела велат дека, по ваквиот став на Уставниот суд, за нив е несфатливо дополнително одлагање на конечната одлука.

Тие сметаат дека секое релативизирање на принципите на независност и самостојност претставува опасен преседан.

Предупредување за одлив на обвинители

Од ОЈО предупредуваат дека продолжувањето на ваквата состојба може да предизвика сериозен одлив на јавнообвинителски кадар.

Според нив, тоа директно би го загрозило нормалното функционирање на обвинителствата.

Дополнителен проблем се хроничниот недостаток на јавнообвинителска служба, ограничениот буџет и недоволните основни услови за работа.

Тврдат дека платите се најниски во регионот

Од обвинителството наведуваат дека платите на јавните обвинители во Македонија и натаму се компаративно најниски во регионот.

Тие очекуваат ваквата состојба да биде нотирана и во претстојниот извештај на Европската комисија како назадување во однос на самостојноста на Јавното обвинителство.

„Бараме од Уставниот суд, по повеќе од осум месеци од поднесувањето, да покаже слух за аргументите во иницијативите и да ја исправи неправдата што му се нанесува на јавното обвинителство“, се наведува во соопштението.

Обвинителите бараат одлука за платите што побрзо, предупредувајќи дека натамошното одлагање може да има последици врз кадарот, независноста и функционирањето на целото Јавно обвинителство.