Герасимовски оствари средба со поранешните противкандидатки за заеднички иницијативи во Општина Центар

Градоначалникот на Општина Центар, Горан Герасимовски, денеска се сретна со неговите поранешни противкандидатки од локалните избори, Билјана Ивановска од „Независни заедно“ и Марија Среброва од „Левица“. На средбата, поради „службени обврски“, не присуствуваше кандидатот Мирослав Лабудовиќ од „Знам“.

На состанокот, на кој беа присутни и раководителите на секторите во општината, се разговараше за повеќе прашања од интерес за жителите, урбанистички планови, уредување на зеленилото, нови паркинг-зони и најавеното затворање на сообраќајот во Дебар Маало.

„Ги ценам и почитувам моите противници во изборниот процес. Уште во предизборието реков дека секој нивен предлог или иницијатива ќе бидат добредојдени. Нивните искуства и ангажмани го подигнаа квалитетот на целиот изборен процес. Се надевам дека ќе продолжиме со соработка и во иднина“, изјави Герасимовски.

Учесниците се договорија ваквите средби да продолжат и понатаму, со цел заеднички да се развиваат иницијативи кои ќе придонесат за подобар живот на жителите на Општина Центар.

Share on Facebook

Tweet

Follow us

Save