Унгарија ја блокираше идејата за еврообврзници од замрзнатите руски пари за Украина
06/12/2025 9:44
Унгарија вчера формално ја отфрли можноста Европската унија да издаде еврообврзници за финансирање на Украина, пренесува Политико. Со ова, Унијата останува без потенцијален „план Б“ во случај земјите-членки да не постигнат договор за користење на замрзнатите руски средства како основа за заем од 165 милијарди евра.
Европската комисија бара лидерите на ЕУ уште овој месец да одобрат финансиски пакет за стабилизација на украинската економија, преку заем гарантиран со резервите на руската Централна банка замрзнати во Европа. Белгија е најголемиот противник на овој модел, бидејќи држи најголем дел од средствата и стравува дека ќе ги сноси последиците доколку Москва поднесе тужба.
Како алтернатива, Комисијата предложи издавање еврообврзници, но Будимпешта целосно ја отфрли идејата за заедничко задолжување преку седумгодишниот буџет на ЕУ, потврдија европски дипломати за Политико.
Одбивањето дојде само неколку часа пред работната вечера во Брисел меѓу германскиот канцелар Фридрих Мерц и белгискиот премиер Барт де Вевер, каде главна тема беше токму заемот за Украина. Мерц изјави дека сака да ги увери белгиските власти:
„Многу сериозно ги сфаќам грижите на премиерот Де Вевер… Не сакам да го убедувам, туку да го уверувам дека патот што го предлагаме е правилен.“
Германија понуди гаранција од 25% од средствата за да ја убеди Белгија да ги поддржи замрзнатите руски фондови како колатерал. Но Де Вевер инсистира на поширока заедничка гаранција од сите земји-членки.
Комисијата уверува дека правните ризици се минимизирани, но и дека без ваков заем украинските фондови би се исцрпиле уште во април 2026 година. Планот предвидува 115 милијарди евра за украинската одбранбена индустрија и 50 милијарди евра за буџетски потреби на Киев во следните пет години.
Напнатоста дополнително ја зголеми изјавата на потпретседателот на рускиот Совет за безбедност, Дмитриј Медведев, кој предупреди дека користењето на руските замрзнати средства од ЕУ ќе се смета за „casus belli“ – причина за војна.
Преговорите продолжуваат, но европски официјални лица не очекуваат брз пробив поради тврдите позиции на Унгарија и Белгија.
Унгарија вчера формално ја отфрли можноста Европската унија да издаде еврообврзници за финансирање на Украина, пренесува Политико. Со ова, Унијата останува без потенцијален „план Б“ во случај земјите-членки да не постигнат договор за користење на замрзнатите руски средства како основа за заем од 165 милијарди евра.
