13 затвореници се пронајдени мртви во затвор во јужен Еквадор, откако експлозивна направа била детонирана пред казнено-поправниот дом во градот Мачала, соопшти Националната служба за сеопфатна грижа за затворениците (SNAI).
Според информациите, телата биле откриени по експлозијата, но засега не е познато дали инцидентот е директно поврзан со смртта на затворениците. Како што објави CNN, надлежните институции не ја исклучуваат ниту една можност.
Од SNAI информираа дека се спроведуваат обдукции и таканаречени „рутински процедури“ со цел да се утврдат причините за смртта и да се расчистат околностите под кои дошло до трагедијата.
„По инцидентот, полицијата пристигна на местото на настанот и истовремено изврши итна интервенција и детална инспекција на затворскиот центар“, соопштија од SNAI пред новинарите, додавајќи дека истрагата продолжува.
Овој настан е најнов во низата сериозни случаи на насилство во затворскиот систем на Еквадор, кои се регистрирани од почетокот на годината, во услови на зголемени тензии и проблеми со безбедноста во казнено-поправните установи.
