Бурна новогодишна ноќ во болниците: прострелни рани, тешки повреди и деца повредени од пиротехника
01/01/2026 14:45
Новогодишната ноќ донесе зголемен број повреди: хируршките клиники полни, има прострелни рани и деца повредени од пиротехника
Дежурните хируршки служби низ земјава имаа исклучително напорна новогодишна ноќ, откако во болниците беа донесени десетици пациенти со различни повреди – од сообраќајни незгоди и физички напади, до прострелни рани и сериозни повреди од пиротехнички средства.
Според информациите од здравствените установи, во текот на ноќта се случиле три сообраќајни незгоди, во кои биле повредени околу 20 лица. Кај повеќето се работело за полесни телесни повреди, по што биле пуштени на домашно лекување. Меѓу посериозните случаи е 17-годишна девојка од Тетово, која била примена со тешки повреди и веднаш била подложена на хируршка интервенција.
Лекарите посочуваат дека во главниот град немало тешки сообраќајни инциденти, што делумно се припишува на зголемениот надзор и функционирањето на системот „Сејф Сити“.
Во болниците биле примени и неколку пациенти со тешки повреди по пад од висина. Три лица биле класифицирани како политрауматизирани, меѓу кои и 30-годишен маж пронајден во реонот на Буњаковец во критична состојба. Кај него била извршена операција на ’рбетниот столб и е сместен на интензивна нега. На Клиниката за неврохирургија е згрижен и 16-годишен пациент од Штип, исто така по пад од висина.
Особено загрижувачки е случајот со двегодишно дете, кое било донесено на интензивно лекување со прострелна повреда на главата. Детето е во животна опасност, а идентитетот и околностите под кои се случил настанот засега не се познати.
Во текот на ноќта биле регистрирани и осум случаи на физички пресметки. Дел од повредените биле пуштени по укажаната помош, додека едно лице било примено со убодна рана од нож во пределот на половината. Дополнително, регистриран е и случај на прострелна рана во пределот на лактот кај пациент од Скопје, повреден во Прилеп, кој бил подготвен за оперативен зафат.
Голем број интервенции биле предизвикани и од неконтролирана употреба на пиротехнички средства. Вкупно 20 лица побарале медицинска помош поради вакви повреди, од кои дел биле згрижени на Клиниката за пластична хирургија. Две деца, на возраст од 12 и 13 години, се хоспитализирани на Детска хирургија и кај нив е планирано оперативно лекување. Повреден е и 69-годишен маж со сериозни повреди на раката, додека неколку лица со полесни повреди биле пуштени дома.
Медицинските лица предупредуваат дека бројот на повредени оваа новогодишна ноќ е значително повисок во споредба со претходните години, а дел од инцидентите се поврзуваат со консумирање алкохол и небезбедно користење пиротехника. Надлежните служби продолжуваат со истрага за потешките случаи.
