Во текот на вчерашната ноќ во Скопје е убиен турски државјанин, информираше министерот за внатрешни работи Панче Тошковски.
Според неговата изјава, во инцидентот учествувала поголема група лица, а при нападот било употребено ладно оружје – нож.
„Во конкретниот кривично-правен настан имаме едно лице кое починало и едно лице кое е потешко повредено“, изјави Тошковски.
Повреденото лице е хоспитализирано и му се укажува лекарска помош, додека истрагата за утврдување на сите околности е во тек.
Истражните органи, како што информира министерот, имаат едно осомничено лице, кое во моментов е во бегство. Поради интересите на истрагата, не се соопштуваат дополнителни детали.
Од Министерство за внатрешни работи најавуваат дека јавноста ќе биде информирана штом ќе има нови официјални информации.
