Катастарот со рекордни резултати во 2025: Решени над еден милион предмети, целосно расчистени заостанатите случаи
02/01/2026 16:41
Агенцијата за катастар на недвижности во текот на 2025 година оствари значајни резултати во работењето, потврдувајќи ја заложбата за ефикасна, транспарентна и одговорна услуга кон граѓаните и правните лица.
Во текот на годината биле решени вкупно 1.040.137 предмети, со што Агенцијата постигна целосно расчистување на заостанатите предмети, а сите тековни барања се решаваат навремено и во законските рокови, без застој.
📊 Висока ефикасност и контрола
До Секторот за контрола и надзор при Агенцијата биле поднесени 577 претставки, од кои 556, односно 96,4%, се целосно обработени и затворени.
Во делот на графичкиот регистар на градежно земјиште, примени се 3.878 предмети, од кои 3.863 (99,6%) се успешно решени, што укажува на високо ниво на ажурност и ефикасност.
Преку електронскиот систем е-Влада, во 2025 година биле доставени 416 барања за мислење, а сите се одговорени, со што реализацијата на овој сегмент изнесува 100%.
📉 Помалку нерешени, повеќе нови предмети
Една од клучните заложби на раководството било системското намалување на заостанатите случаи. Во таа насока:
бројот на нерешени тековни предмети е намален за 47,4%,
бројот на новопримени предмети е зголемен за 8% во однос на 2024 година.
🗣️ Живковски: Продолжуваме со дигитализација и транспарентност
Директорот на Агенцијата, Иван Живковски, во објава на социјалните мрежи истакна дека поставените цели за 2025 година се целосно реализирани, а резултатите се најдобар доказ за тоа.
„Овие бројки се јасен показател за подобрената организација, засилената контрола и зголемената ефикасност. Во наредниот период продолжуваме со интензивна дигитализација, унапредување на услугите и зголемување на транспарентноста, со јасна цел, побрзи и поквалитетни услуги за граѓаните“, истакна Живковски.
