Нови правила за угостителите: државен регистар за лиценци, онлајн постапки и нови трошоци за приватното сместување

Во Собранието веќе е поднесен Предлог-закон за изменување и дополнување на Законот за угостителската дејност. Со него се најавуваат сериозни промени и нови правила за угостителите, но и за физичките лица што издаваат приватно сместување.

Предлогот носи нови регистри, повеќе електронски постапки, построги правила за категоризација и повисоки надоместоци во дел од процедурите. Целта, според Владата, е помалку администрација и поефикасни услуги.

Регистар за ноќните локали

Една од највидливите новини е формирање државен регистар на издадени лиценци за ноќни барови, кабареа, дискоклубови и дискоклубови на отворен простор.

Овој регистар ќе го води Министерството за економија и труд. Во него ќе бидат внесени сите издадени лиценци во државата.

Воедно, постапката за добивање лиценца треба да стане побрза. Според предлогот, министерот ќе треба да донесе решение во рок од 30 дена од поднесувањето на барањето. Лиценцата ќе се издава истиот ден кога ќе биде донесено решението.

Построга категоризација за приватното сместување

Големи промени се предвидуваат и за приватното сместување. Категоризацијата на куќи за одмор, апартмани, станови и соби за издавање повеќе нема да биде само формалност.

Неа ќе ја вршат тричлени комисии што ќе ги формираат градоначалниците. Решението за категоризација ќе се носи во рок од 30 дена и ќе важи три години.

Секоја општина ќе мора да води регистар на категоризирани објекти. Дополнително, двапати годишно ќе треба да доставува извештаи до Министерството за економија и труд.

Со ова, државата сака да воспостави единствена база на податоци за сите сместувачки капацитети во земјата.

Нови трошоци за издавачите

Нова финансиска обврска добиваат и физичките лица што издаваат сместување. Трошоците за категоризација ќе бидат на нивен товар.

Висината на надоместокот ќе ја определува градоначалникот на општината. Тоа значи дека издавачите на апартмани, соби и куќи за одмор ќе треба дополнително да плаќаат за постапката.

Финансиски измени има и кај дел од другите постапки. Со предложените измени се удвојуваат надоместоците во членот 27-г.

Наместо досегашните 100, 200, 300, 400 и 500 евра, новите износи ќе бидат 200, 400, 600, 800 и 1.000 евра.

Речиси сè ќе оди електронски

Предлог-законот носи и силна дигитализација на секторот. Угостителите, туристичките агенции и физичките лица ќе можат електронски да поднесуваат барања за регистрација, да пријавуваат исполнетост на условите за работа и да бараат лиценци.

Комуникацијата со институциите ќе се води преку Националниот портал за електронски услуги. Решенијата, лиценците и другите документи ќе може да се издаваат во електронска форма.

И жалбените постапки ќе се водат по електронски пат. Во случај на технички проблеми, ќе може да се користи квалификувана електронска препорачана достава.

Во пракса, тоа значи дека граѓаните и компаниите нема постојано да носат документи од една институција во друга. Државните органи ќе бидат обврзани дел од потребните податоци да ги обезбедуваат по службена должност.

Нови казни и рокови

Предвидени се и нови санкции за службени лица и за членови на комисии. Казни од 25 до 50 евра ќе добиваат службениците што нема навреме да ги обезбедуваат доказите или нема да постапуваат во законските рокови.

За необјективна категоризација, членовите на комисиите ќе се соочат со глоба од 150 евра. Одговорните лица што нема да ги достават решенијата до барателите ќе може да бидат казнети со од 300 до 500 евра.

Според предлогот, угостителите и физичките лица ќе имаат рок од една година да го усогласат работењето со новите правила. Новите регистри и подзаконски акти, пак, треба да бидат воспоставени во рок од шест месеци.

Што сака да постигне Владата

Според Владата, реформата е дел од обврските од Реформската агенда. Треба да донесе помалку административни бариери, побрзи услуги и поефикасна јавна администрација.

Воедно, со исполнување на овие обврски државата ќе може да користи и европски средства од Инструментот за реформи и раст за Западен Балкан.

Со други зборови, нови правила за угостителите не носат само технички измени. Тие ќе значат и нови обврски, нови трошоци и нов начин на работа за целиот сектор.