Каракас: 100 загинати во американскиот напад врз Венецуела
08/01/2026 8:58
Во американскиот напад во кој во саботата беше соборен венецуелскиот претседател Николас Мадуро, загинале 100 лица, соопшти синоќа венецуелскиот министер за внатрешни работи Диосдадо Кабело.
Ова е прва официјална бројка на жртви што ја објавува Венецуела, откако претходно властите во Каракас не изнесоа податоци за човечките загуби. Венецуелската армија, пак, претходно објави список со 23 загинати припадници на вооружените сили.
Според венецуелските власти, значителен дел од безбедносниот контингент на Мадуро бил убиен „ладнокрвно“ за време на операцијата. Истовремено, од Куба тврдат дека 32 припадници на нивните воени и разузнавачки служби, кои се наоѓале во Венецуела, исто така, загинале во нападот.
Кабело изјави и дека сопругата на Мадуро, Силија Флорес, која беше приведена заедно со него, се здобила со повреда на главата, додека самиот Мадуро ја повредил ногата за време на американската операција за негово апсење.
Во меѓувреме, привремената претседателка на Венецуела, Делси Родригез, прогласи еднонеделна жалост за војниците убиени во нападот. Кабело ја пофали Родригез за, како што рече, нејзината храброст и лидерство, во својата редовна неделна емисија на државната телевизија.
Настаните околу соборувањето на Мадуро и последиците од американската интервенција продолжуваат да предизвикуваат сериозни регионални и меѓународни реакции.
