Температурен шок на Балканот: студот се враќа наскоро
14/01/2026 14:46
По силниот студен бран, обилните снежни врнежи и екстремно ниските температури, во Хрватска пристигна нагла промена на времето, проследена со затоплување и засилен јужен ветер. Во текот на неделата се очекува натамошен пораст на температурите, при што максималните дневни вредности во внатрешноста би можеле да се приближат до 10 степени.
Ова претставува вистински температурен шок, ако се земе предвид дека вчера наутро во Загреб беа измерени минус 12 степени.
Во Србија, врвот на студениот бран завршува денес. Земјата беше зафатена од снег и ниски температури, но од средината на неделата се најавува краток период на затоплување, кој според прогнозите би можел да трае од седум до десет дена.
Српскиот метеоролог Иван Ристиќ предупредува дека и покрај потоплото време, зимата не е завршена.
„Се зборуваше за руска зима. Сибирскиот антициклон повторно ќе донесе ладен воздух и температурите ќе паднат под нулата. Очекуваме нови снежни врнежи околу 24 или 25 јануари. Значи, зимата брзо ќе се врати“, изјави Ристиќ.
Според актуелните метеоролошки модели, постојат индикации дека и Хрватска повторно би можела да биде погодена од зимски бран кон крајот на јануари. Како што наведува специјализираниот метео-портал Истрамет, континенталниот антициклон ќе го задржи студот над источниот дел од Европа, кој при првата можност повторно ќе се спушти над Балканот.
Слични прогнози изнесе и познатиот метеоролог аматер Дино Дундиќ, кој предупреди на можна нова гранка на поларниот вортекс што би пристигнала од Сибир.
„Кон крајот на јануари и почетокот на февруари повторно ќе има минусни температури, зимски услови и снег. Зимата не е ни приближно завршена“, порача Дундиќ, отфрлајќи ги тврдењата дека пролетта е на прагот
