Дневен билтен на МВР: Сообраќајки со тешко повредени, приведувања и кривични пријави

Министерството за внатрешни работи информира за низа настани регистрирани во текот на изминатиот ден, кои вклучуваат сообраќајни несреќи со тешки телесни повреди, кривични пријави, нарушување на јавниот ред и мир и случаи на семејно насилство.

Надворешната канцеларија за криминалистички работи Струга поднесе кривична пријава против Н.М.(18) од Охрид и 16-годишен малолетник од с. Мешеишта, општина Дебрца, поради сомнение за кривично дело „загрозување на сигурноста“. На 24 април 2025 година, во с. Мислешево, осомничениот управувал патничко возило „застава“ без регистарски таблички, натоварено со огревно дрво, при што не застанал на полициски знак и се обидел со возилото да ги удри полициските службеници.

Во Прилеп, на 14 јануари 2026 година во 10:55 часот, на крстосница помеѓу улиците „Тризла“, „Горан Миноски“ и „11 Октомври“ се случила сообраќајна несреќа меѓу патничко возило „фолксваген пасат“ и мопед. Во несреќата тешко е повреден 60-годишен маж, а увид извршила екипа на ОВР Прилеп.

Истата вечер, во Скопје, на улицата „Македонско-косовска бригада“, 16-годишен возач со патничко возило „фолксваген голф“ удрил во пешак на 57-годишна возраст, кој се здобил со тешки телесни повреди и бил пренесен во Клиничкиот центар „Мајка Тереза“.

СВР Куманово поднесе кривична пријава против 40-годишен жител на Куманово поради сомнение за кривично дело „изработување и набавување оружје и средства за извршување кривично дело“, откако при контрола на возило биле пронајдени 28 универзални клучеви и алат за отворање брави.

Во скопската населба Бит Пазар, полициски службеници привеле пет лица, меѓу кои и еден малолетник, поради физичка пресметка настаната по сообраќајно недоразбирање. Дополнително, на подрачјето на Гази Баба е приведен 51-годишен маж осомничен за семејно насилство врз неговата партнерка.

МВР регистрирало и инцидент во авион кој слетал од Германија на Меѓународниот аеродром Скопје, како и физички напад врз возач на ЈСП Скопје во општина Аеродром.

Во уште еден случај, 54-годишна жена од скопско село пријавила дека била измамена за сума од 95.400 денари со лажно ветување за купување стан и вработување на нејзината ќерка.

Од Министерство за внатрешни работи информираат дека по сите случаи се преземаат мерки за целосно расчистување и ќе следуваат соодветни пријави.

Share on Facebook

Tweet

Follow us

Save