Трагедија во Триполи: Најмалку 9 загинати по уривање на станбена зграда

09/02/2026 11:10

Најмалку 9 лица го загубија животот, меѓу кои жена и дете, по уривање на повеќекатна станбена зграда во Триполи, на северот од Либан, објавија либанските медиуми.

Според информациите, шест лица биле спасени живи од урнатините, додека спасувачките екипи и понатаму интензивно пребаруваат во потрага по уште осум лица за кои се верува дека се затрупани под рушевините, соопшти државната Национална новинска агенција.

На местото на несреќата се собрале десетици граѓани, што довело до тензична ситуација. Поради безбедносни причини, либанската полиција интервенирала пукајќи во воздух за да ја растера насобраната толпа, пренесува Associated Press.

Причините за уривањето на зградата засега не се официјално соопштени, а надлежните служби најавуваат истрага за утврдување на одговорноста.