Референдум во Швајцарија за даноци, медиуми, готовина и климатски фонд

Граѓаните на Швајцарија денеска гласаат на референдум за четири важни прашања кои се однесуваат на даночниот систем, финансирањето на јавните медиуми, користењето готовина и климатската политика.

Едно од клучните прашања е предлогот за воведување индивидуално оданочување на брачните двојки. Според последната анкета од февруари, 52 проценти од граѓаните ја поддржуваат оваа промена, додека 44 проценти се против.

Со предложената реформа, сопружниците би поднесувале одделни даночни пријави и би се оданочувале врз основа на сопствениот приход, наместо како заедничко домаќинство. Конзервативните партии се спротивставуваат на оваа промена, сметајќи дека таа го поткопува традиционалниот семеен модел, додека кантоните предупредуваат на можни фискални загуби и зголемена бирократија.

Швајцарците гласаат и за иницијативата за намалување на претплатата за јавниот радиодифузен сервис од 335 на 200 швајцарски франци по домаќинство. Поддржувачите, предводени од Швајцарската народна партија, сметаат дека поради растечките трошоци за живот надоместокот треба да се намали.

Од друга страна, Владата и Парламентот предупредуваат дека ваквото кратење може да го загрози квалитетот и разновидноста на јавните медиуми. Според последните анкети, околу 54 проценти од гласачите се против намалувањето.

Голема поддршка има и иницијативата „Готовината е слобода“, со која се предлага достапноста на банкнотите и монетите да биде гарантирана во Уставот. Иако користењето на кеш постепено се намалува, многу граѓани сакаат тој да остане достапен како сигурна опција.

Владата предложи алтернативно решение кое ја поддржува идејата, но користи поширок термин „готовина“, наместо конкретно да ги наведува монетите и банкнотите.

Најмали шанси за успех има иницијативата за формирање федерален климатски фонд. Со предлогот на Социјалдемократите и Зелените се бара инвестирање меѓу 0,5 и 1 процент од бруто домашниот производ во обновливи извори на енергија и заштита на биодиверзитетот.

Според анкетите, околу 65 проценти од гласачите се против оваа иницијатива, додека Владата ја оцени како прескапа и неефикасна.

Гласачките места се отворени во текот на целиот ден, а првичните резултати од референдумот се очекуваат во попладневните часови.

Share on Facebook

Tweet

Follow us

Save