Ако Груевски се врати ќе оди во затвор, изјави денеска премиерот Христијан Мицкоски, одговарајќи на прашање дали очекува поранешниот премиер да се врати од Будимпешта во Македонија.
Мицкоски рече дека нема такви очекувања. Но, нагласи дека ако Никола Груевски се појави во државата, веднаш ќе постапат надлежните институции.
Според него, државата има правосилна пресуда. Тоа, како што рече, значи дека органите на редот ќе го обезбедат и ќе го упатат на отслужување затворска казна.
Мицкоски порача дека ако Груевски се врати ќе оди во затвор. Владата е должна да ги почитува законите и институциите. Тој додаде дека секој има право да ги користи правните механизми, но дека Владата постапува според правосилните одлуки.
Изјавата доаѓа по новинарско прашање поврзано со случувањата во Унгарија. Повод беше победата на опозиционерот Петер Маѓар и неговата најава дека избегани странски политичари кои добиле азил во Унгарија би можеле да бидат екстрадирани.
Двегодишната казна затвор што Груевски ја доби во случајот „Тенк“ застаре во октомври 2024 година. Сепак, тој и натаму се бара и за други предмети, меѓу кои „Титаник“, „Плацевите на Водно“, „Талир 1“ и „Талир 2“.
Последното официјално барање за екстрадиција било испратено во 2019 година. Тоа се однесувало на сите случаи за кои тогаш се водеа постапки и за кои била распишана меѓународна потерница.
Груевски избега од Македонија на 8 ноември 2018 година. Неколку дена подоцна соопшти дека се наоѓа во Будимпешта, каде што доби политички азил од унгарските власти.
Ако Груевски се врати ќе оди во затвор, изјави денеска премиерот Христијан Мицкоски, одговарајќи на прашање дали очекува поранешниот премиер да се врати од Будимпешта во Македонија.
