Вајц: Не гледам вистински исчекор ниту во реформите, ниту во спроведувањето на реформската агенда кај Македонија
27/04/2026 9:33
Не гледам вистински исчекор ниту во реформите, ниту во спроведувањето на реформската агенда, изјави известувачот за Македонија во Европскиот парламент, Томас Вајц, во интервју за Еуроњуз на бугарски јазик. Тој порача дека Владата мора да ја искористи актуелната можност за напредок кон Европската Унија. Во спротивно, како што рече, тоа ќе биде штета и за државата и за граѓаните.
Вајц оцени дека проблем не е само прашањето со внесувањето на Бугарите во Уставот. Според него, сериозен проблем е и тоа што во земјата нема доволен реформски напредок и дека е изгубена цела една година.
Уставните измени остануваат услов
Евроизвестувачот повтори дека уставните измени се услов без кој преговорите навистина не можат да продолжат. Тој посочи дека постојат одредени позитивни чекори, како Акцискиот план за прашањата на малцинствата, но оцени дека тоа не е доволно без суштински реформи.
Според Вајц, доколку Владата не ги спроведе потребните промени, нема да може да се влезе во вистински преговори со Европската Унија.
Без реформи нема ниту европски пари
Тој предупреди дека реформската агенда и Планот за раст се подеднакво важни како и формалниот почеток на преговорите. Ако државата не ги исполни обврските, 47 милиони евра нема да завршат во Македонија, туку кај соседните земји.
Владеењето на правото е клучно
Како најважни реформи за земјата, Вајц ги посочи владеењето на правото, борбата против корупцијата и обезбедувањето независно судство. Тој оцени дека без тоа нема правда за граѓаните, нема сигурност за бизнисите и нема сериозни странски инвестиции.
Според него, корупцијата е рак во општеството и државата мора да покаже дека има институции и политичка волја да се справи со неа.
Албанија напредува, Македонија стои
Вајц рече дека разликата меѓу Македонија и Албанија е резултат на принципот на заслуги. Албанија, според него, напредува побрзо и не треба да биде закочена затоа што друга земја не ги спроведува реформите.
Тој посочи дека поддршката за ЕУ кај македонските граѓани расте и изрази надеж дека Владата ќе го слушне тој сигнал.
Постои прозорец што не смее да се пропушти
Вајц смета дека геополитичката состојба отвора поволен прозорец за сите земји од Западен Балкан во однос на проширувањето. Но, предупреди дека ако Македонија не ја искористи оваа можност, тоа сериозно ќе ги разочара граѓаните.
Тој додаде дека, ако земјата навистина се посвети на реформите, и натаму има шанса да се придвижи поблиску до групата земји што напредуваат кон членство. Но засега, како што нагласи, не гледа доволна политичка волја за тоа.
Не гледам вистински исчекор ниту во реформите, ниту во спроведувањето на реформската агенда, изјави известувачот за Македонија во Европскиот парламент, Томас Вајц, во интервју за Еуроњуз на бугарски јазик. Тој порача дека Владата мора да ја искористи актуелната можност за напредок кон Европската Унија. Во спротивно, како што рече, тоа ќе биде штета и за државата и за граѓаните.
