Сточарите од Пелагонија на удар: млекарниците ја намалија откупната цена на млекото

Сточарите од Пелагонија се соочуваат со нов удар. Млекарниците ја намалиле откупната цена на суровото млеко за два денари по литар.

Токму така сточарите ја опишуваат состојбата на терен. Според нив, падот на откупната цена трае подолг период, а особено е изразен од минатото лето.

Ако лани млекото се откупувало и до 33 денари за литар, сега цената се движи од 29 до 24 денари. Тоа, велат сточарите, е нов тежок удар врз и онака ослабеното сточарство.

Секој месец нов минус за фармерите

Сточарот Тони Петковски од битолското село Велушина, кој одгледува дваесетина крави, вели дека денеска добил пресметка за млекото предадено во април. Наместо 30 денари, млекото му било пресметано по 28 денари за литар.

Тој вели дека падот на цената е континуиран и дека речиси сите млекарници веќе ја намалиле откупната цена. Во една битолска млекарница, според него, откупот паднал и до 24 денари за литар сурово млеко.

„Тоа е колапс за сточарите, а државата молчи“, вели Петковски, кој е и претседател на здружението „Пелагонско поле“.

Трошоците растат, цената на млекото паѓа

Најголемиот револт кај сточарите е што во исто време растат цените на горивата, репроматеријалите, ѓубривата и добиточната храна. Само цената на нивниот труд, велат, не се вреднува.

Петковски пресметува дека годишно предава околу 45 тони млеко. Со сегашното намалување, штетата за неговото стопанство изнесува меѓу 5.000 и 6.000 евра.

Само за храна за кравите, додава тој, годишно троши околу 8.000 евра. Според него, со вакви цени најмногу страдаат помалите фарми, но состојбата е тешка и кај поголемите производители.

Сточарите бараат средба со Мицкоски

Дополнителен проблем е што сточарите сè уште немаат добиено субвенции по грло добиток за 2025 година. Премијата за млекото, пак, им е исплатена само до јуни 2025 година.

Поради тоа, Петковски вели дека повеќе не сакаат средби со министерот за земјоделство Цветан Трипуновски. Наместо тоа, бараат итна средба со премиерот Христијан Мицкоски.

Според него, кризата не ги погодува само краварите. Во проблеми се и овчарите и козарите.

Револт и кај другите производители

Незадоволство изразува и сточарот Борче Бучински од Могила. Тој вели дека цената на суровото млеко е намалена за дури осум денари по литар во споредба со лани.

„Ако лани цената беше околу 33 денари, сега е 25. А во маркет млекото не е поевтино, туку е уште поскапо“, вели Бучински.

Тој прашува зошто намалувањето кај сточарите не се гледа и на рафтовите во продавниците.

Под пет илјади регистрирани производители во државата

Последната исплата на премијата за млеко била во март годинава. Тогаш биле исплатени 270 милиони денари за 4.545 производители на кравјо, овчо и козјо млеко.

Тоа практично значи дека бројот на регистрирани производители во државата е под 5.000.

За да добијат премија, сточарите треба да прикажат најмалку 300 литри млеко месечно по земјоделско стопанство. Директните плаќања изнесуваат 6 денари по литар кравјо млеко и 7 денари по литар овчо и козјо млеко.

Досега, субвенции за 2025 година се исплатени само за одгледувачите на овци. Пари сè уште нема за краварите и козарите.