По заканувачките објави на ученик, полицајци во цивилка ќе го обезбедуваат училиштето во Битола
08/05/2026 12:39
Во основното училиште „Стив Наумов“ во Битола, за време на наставата ќе има постојано присуство на полициски службеници во цивилна облека.
Мерката е воведена по барање на Училишниот одбор. Одлуката била донесена на вонредна седница, свикана поради случај со ученик од седмо одделение.
Според информациите, ученикот објавил недолични и заканувачки пораки на социјалните мрежи. Објавите биле насочени кон соученици и нивни родители, што предизвикало вознемиреност кај дел од семејствата.
Од Училишниот одбор велат дека нема простор за паника. Оттаму уверуваат дека безбедноста на учениците е под контрола и дека институциите постапуваат согласно своите надлежности.
Во случајот се вклучени повеќе институции
Од училиштето информираат дека се преземени сите чекори предвидени со Законот за основно образование. За случајот навремено биле известени надлежните органи.
Во постапката се вклучени Центарот за социјални работи, СВР Битола, образовните институции и стручните служби во училиштето.
Објавите биле надвор од наставата
Според училиштето, настанот не се случил за време на наставата. Содржините биле објавени надвор од училишниот простор и надвор од наставниот процес.
Ученикот претходно бил преместен во друго одделение, со цел полесна адаптација. Но, по несогласувања со новите соученици, следувале реакции и од родителите.
Родителите побарале преместување
По родителски состанок одржан пред неколку дена, дел од родителите побарале ученикот да биде преместен. Потоа, според информациите, се појавиле нови вознемирувачки објави на социјалните мрежи.
Токму тие објави дополнително ја зголемиле загриженоста кај родителите.
Директорот на училиштето, Никола Пискачев, изјавил дека случајот е пријавен кај надлежните институции. Целта, како што посочил, е целосно расчистување на настанот и непречено одвивање на наставата.
