Албанскиот министер за одбрана, Ермал Нуфи, потврди дека земјата се подготвува да испрати војници во Појасот Газа. За таа цел, албански тим веќе е испратен таму да ја согледа ситуацијата на терен.
Во рамки на Меѓународните сили за стабилизација
„Во рамките на својот ангажман во Мировниот одбор, Албанија презеде мерки за преглед на ситуацијата во Газа. Појасот Газа е под безбедноста на израелските одбранбени сили и секоја инспекција на војниците таму се врши преку меѓународните сили за стабилизација и израелската армија“, изјави Нуфи.
Меѓународните сили за стабилизација произлегуваат од план од 20 точки на американскиот претседател Доналд Трамп.
Конкретен план, но без детали
Нуфи објави дека Генералштабот на албанските вооружени сили подготвил конкретен план, кој се очекува да се реализира на неколку нивоа и фази. Детали засега не се откриени.
Прв контингент во штабот на мисијата
Началникот на Генералштабот, Арбен Кинѓи, потврди дека Албанија во моментов е во процес на изготвување на практичните и правните документи за испраќање војници.
„Генералштабот прави точна процена за мисијата, задачите, безбедноста, правилата за ангажман и логистичката поддршка. Првиот албански контингент ќе биде дел од штабот на Меѓународните сили за стабилизација, а потоа ќе се разгледа можноста за поширок придонес со војници“, изјави Кинѓи.
