Паркирано комбе само тргнало и удрило во девојка кај булевар „Србија“, таа е тешко повредена
24/05/2026 8:11
Тешко е повредена 25-годишна девојка откако во неа удрило товарно возило што било паркирано, а потоа само се придвижило на кружен тек во Скопје.
Според информациите, на 23 мај 2026 година околу 10:10 часот во СВР Скопје било пријавено дека на крстосницата кај кружниот тек меѓу улиците „Христо Татарчев“, „Марко Орешковиќ“ и булеварот „Србија“ се случила сообраќајна незгода.
Во незгодата учествувало товарно возило „фолксваген“ со скопски регистарски ознаки, кое претходно било паркирано од М.Р. (34) од Скопје. Според пријавата, возилото само тргнало и удрило во пешакот И.К. (25) од Скопје.
Од ударот, девојката се здобила со тешки телесни повреди. Повредите ѝ биле констатирани во Ургентниот центар при комплексот клиники „Мајка Тереза“.
Од СВР Скопје информираат дека се преземаат соодветни мерки за утврдување на причините за несреќата, по што ќе следуваат и соодветни поднесоци.
Тешко е повредена 25-годишна девојка откако во неа удрило товарно возило што било паркирано, а потоа само се придвижило на кружен тек во Скопје.
