Собранието во амандманска расправа за законите за судска и обвинителска служба
Денеска во Собранието, Комисијата за политички систем и односи меѓу заедниците ќе ја започне амандманската расправа по Предлог-законот за судска служба и Предлог-законот за јавнообвинителска служба, двата во второ читање. Станува збор за клучни законски решенија кои треба да го уредат статусот на вработените во правосудството.
Над 100 амандмани од опозицијата
За Предлог-законот за судска служба се поднесени над 100 амандмани од пратеничките групи на СДСМ, Европски фронт и Левица, додека за законот за обвинителска служба се поднесени 27 амандмани од СДСМ.
Од СДСМ и коалицијата вчера соопштија дека поднеле вкупно 82 амандмани на двата предлог-закона – 55 за судската и 27 за обвинителската служба, плус 19 дополнителни комисиски амандмани. Тие тврдат дека предложените решенија ја загрозуваат независноста на судството и ја влошуваат положбата на вработените во правосудните институции.
Министерството: Законите се резултат на повеќегодишна работа
Заменик-министерот за правда, Ален Деребан, во образложението потенцира дека предлог-законите се резултат на повеќегодишна работа и широк консултативен процес. Текстовите биле објавени на ЕНЕР пред една година, а во нив биле вградени забелешките од релевантните институции и стручната јавност.
Деребан нагласи дека, поради донесувањето на новиот Закон за административни службеници и склучените колективни договори, било потребно дополнително усогласување на законските решенија. Тој увери дека ниту едно стекнато право на вработените не се губи, туку останува целосно заштитено.
Подобри плати и мерит-базиран систем
Според Деребан, една од клучните цели е унапредување на материјалниот статус на службениците, што веќе е реализирано преку колективните договори.
Новите закони воведуваат посебен и современ систем за судската и обвинителската служба, со:
јасни и транспарентни мерит-базирани правила за вработување и унапредување,
објективни критериуми за оценување и мобилност,
современи механизми за задржување на стручниот кадар,
додатоци на плата и наградување за исклучителни резултати.
Што следува?
Предлог-законите денеска се разгледуваат и на седницата на Законодавно-правната комисија. По амандманската расправа, законите треба да бидат ставени на гласање во Собранието.
Претседателот на Собранието, Африм Гаши, денеска ќе одржи неформална средба со собраниските известувачи за тековните активности во законодавниот дом.
