Резидентите со предност, за останатите следуваат санкции
Од понеделник, 13 јули, во Охрид стапуваат во сила нови правила за паркирање на улиците „Илинденска“, „Коста Абраш“ и „Цар Самоил“, соопштија од ЈП „Билјанини Извори“.
Според новиот режим, обележаните паркинг-места на овие улици ќе можат да ги користат исклучиво резидентни жители кои поседуваат соодветна документација и важечка резидентна налепница.
Блокатори и казни за непрописно паркирање
За сите останати возила паркирањето на означените места ќе биде забрането, а прекршителите ќе се соочат со санкции, вклучително и поставување блокатор на возилото.
Од јавното претпријатие предупредуваат дека возилата оставени на необележани места, на коловоз или на други јавни површини спротивно на сообраќајната сигнализација ќе бидат санкционирани од страна на Министерството за внатрешни работи.
Бесплатен паркинг за резидентите до 1 септември
Резидентните жители ќе можат бесплатно да го користат паркингот кај Општина Охрид до 1 септември, додека за туристите и останатите посетители ќе остане достапно паркирањето во Б-зоната, каде ќе може да се набави месечен паркинг-билет.
Дотурот на стока само до 10 часот
Од ЈП „Билјанини Извори“ потсетуваат и дека дотурот на стока во стариот дел на Охрид мора да се реализира најдоцна до 10 часот наутро.
Надлежните апелираат до граѓаните и посетителите да ги почитуваат новите правила со цел да се намали сообраќајниот метеж и да се обезбеди подобра организација во најфреквентните делови на градот во текот на туристичката сезона.
