Казните за „пајак“ ги наплаќал во кеш, парите ги ставал во џеб: Притворен полицаец од Скопје

Казните за „пајак“ ги наплаќал во кеш, а парите ги задржувал за себе, се сомнева Обвинителството за полицаец од СВР Скопје.

Осомничениот е под истрага за продолжено кривично дело „злоупотреба на службената положба и овластување“, а судот му определи осумдневен притвор.

Штетата изнесува најмалку 85.500 денари

Кривичната постапка ја води јавен обвинител од Специјализираното одделение при ОЈО ГОКК.

Според досега прибавените докази, полицаецот од април до јули презел повеќе поврзани дејствија во Скопје.

Обвинителството се сомнева дека со злоупотреба на службената положба прибавил противправна корист за себе и за други лица.

На државниот буџет, според првичната проценка, му била причинета штета од најмалку 85.500 денари.

Наплаќал во готово наместо преку ПОС-терминал

Осомничениот извршувал работни задачи во депото на ЈП „Градски паркинг“.

Таму биле носени возила подигнати со специјално возило „пајак“ поради непрописно паркирање.

За дел од сопствениците изготвувал записници и прекршочни платни налози.

Наместо глобите да ги наплати преку ПОС-терминал, според Обвинителството, тој ги земал парите во готово и ги задржувал.

На записниците приложувал потврди од претходни уплати извршени за други лица и по други предмети.

На некои возачи им пресметувал помали казни

Во други случаи, полицаецот наводно ги квалификувал прекршоците како полесни од фактички утврдените.

Со тоа им изрекувал пониски глоби и им овозможувал корист на други лица.

За дел од возачите воопшто не составувал записници и не наплаќал казни.

Иако нивните автомобили биле однесени во депото, им дозволувал да ги подигнат истиот ден без целосно спроведување на постапката.

Опасност од бегство и влијание врз сведоци

Јавниот обвинител побарал притвор поради опасност од бегство, повторување на делото и влијание врз сведоците.

Судија на претходна постапка го прифатил предлогот и на осомничениот му определил притвор од осум дена.

Казните за „пајак“ ги наплаќал во кеш, а парите ги ставал во џеб, се сомнева Обвинителството, додека истрагата продолжува.