Косовски „Проекс Интернационал“ влегува во „Тинекс“, српски „Јасмин“ презема четири „Космо“ продавници

До Комисијата за заштита на конкуренцијата е доставено известување за концентрација со која „Проекс Интернационал“ од Приштина има намера да стекне контрола врз „Тинекс Маркет“.

 

Станува збор за трансакција поврзана со малопродажниот бизнис на „Тинекс-МТ“ во Македонија.

 

„Интерекс“ треба партнерски да управува со маркетите

 

Под групацијата „Проекс Интернационал“ работи синџирот маркети „Интерекс“.

 

Според претходно објавените информации, овој бренд во иднина треба партнерски да управува со маркетите на „Тинекс“.

 

За оваа цел „Тинекс-МТ“ формираше посебна фирма-ќерка „Тинекс Маркет“.

 

Во неа треба да биде префрлен малопродажниот бизнис на компанијата.

 

Договорена рамката за трансакцијата

 

Според известувањето на КЗК, на 2 јули 2026 година било потпишано Писмо за намери и рамка за трансакцијата.

 

Со документот биле договорени главните комерцијални услови и структурата на идното преземање.

 

Предмет на трансакцијата е малопродажниот бизнис што моментално го управува „Тинекс-МТ“.

 

Тука влегуваат брендовите „Тинекс“, „СуперТинекс“, „Тинекс Деликатес“, „Конто“ и „Спот“.

 

Формирана нова компанија „Тинекс Маркет“

 

По потпишувањето на Писмото за намери, на 14 јули 2026 година било регистрирано друштвото „Тинекс Маркет“ ДООЕЛ Скопје.

 

Новата компанија треба да служи како средство за стекнување и управување со малопродажниот бизнис.

 

На неа треба да ѝ бидат ставени на располагање бизнисот или неговите релевантни делови.

 

Конечните услови дополнително треба да бидат регулирани со преддоговор и финална документација.

 

„Проекс“ досега немал присуство во Македонија

 

Главната дејност на „Проекс Интернационал“ е трговија на мало во неспецијализирани продавници, претежно со храна и пијалаци.

 

Според КЗК, компанијата и групацијата на која припаѓа немаат поврзани субјекти регистрирани во Македонија.

 

Во 2025 година не оствариле ниту приход на македонскиот пазар.

 

Српски „Јасмин“ презема четири „Космо“ продавници

 

Паралелно со ова, КЗК објави и друга концентрација поврзана со „Тинекс-МТ“.

 

„Јасмин Парфимерија“ ДООЕЛ Скопје треба да преземе четири деловни единици на „Космо Тинекс Дрогерии“.

 

Со преземањето ќе бидат опфатени и залихите, опремата и мебелот во продавниците.

 

Преземените продажни места треба да продолжат да работат под нов бренд.

 

Потоа „Јасмин“ треба да премине под белградската компанија

 

Според најавената структура, прво треба да биде преземено работењето на четирите „Космо“ продавници.

 

Потоа целокупниот удел во „Јасмин Парфимерија“ ДООЕЛ Скопје треба да биде пренесен од „Матосс Гроуп“ на „Јасмин“ ДОО Белград.

 

Со тоа, два различни процеси на преземање се отвораат околу бизнисите на „Тинекс-МТ“ – маркетите и дел од дрогериите „Космо“.