Тапанарот од ДНК Ѓорѓи Ѓоргиев кој загина во „Пулс“ доби споменик во родната Струмица

06/09/2026 21:40

Тапанарот од ДНК Ѓорѓи Ѓоргиев кој загина во пожарот во дискотеката „Пулс“ во Кочани доби споменик во родната Струмица.

По тој повод, градоначалникот на Струмица, Петар Јанков, објави емотивна порака посветена на Ѓорѓи, кого лично го познавал.

„Џоче, Струмица ќе те памети“, порача Јанков, присетувајќи се на неговиот талент, карактер и добрина.

„Да не се помириме со несреќите“

Јанков порача дека споменот на Ѓорѓи и на останатите жртви од трагедијата во Кочани треба да биде потсетник за целото општество.

„Да не се помириме со несреќите. Да не прифатиме дека ваквите трагедии се нешто што едноставно се случува. Затоа што зад секој таков настан стојат семејства, стојат нечии соништа“, наведе тој.

Според градоначалникот, мора да има правда и одговорност.

Тој смета дека само така споменот на загинатите може да добие вистинска смисла.

„Џочето е поим за прекрасно дете“

Јанков со посебна емоција се присети на Ѓорѓи Ѓоргиев.

„Гордост е за човек да познава исклучително талентирано, паметно и пристојно дете. Џочето е поим за прекрасно дете. Дете кое пленеше со својата добрина, со насмевката и со својот талент“, напиша Јанков.

Ѓорѓи во Струмица бил познат како одличен тапанар.

Сепак, за луѓето кои го познавале, неговиот музички талент бил само еден дел од неговата личност.

„Зад тој талент стоеше едно искрено, вредно и прекрасно дете“, посочи Јанков.