Една година од пожарот во „Пулс“: Кочани се сеќава на 63-те жртви

Една година по трагедијата во дискотеката „Пулс“ во Кочани, Македонија повторно се потсети на ноќта што засекогаш го промени градот и остави длабока болка во целото општество.

Во пожарот животот го загубија 63 млади лица. Токму затоа, и по 12 месеци, споменот на таа ноќ останува силен, а прашањата за одговорност и правда сè уште се отворени.

Судскиот процес е во тек

Судскиот процес за пожарот во „Пулс“ продолжува. На обвинителна клупа се 34 физички и три правни лица.

Меѓу обвинетите се сопственици на клубот, инспектори, поранешни градоначалници, обезбедувачи и државни службеници.

На досегашните рочишта сите изјавиле дека го разбираат обвинението, но не се чувствуваат виновни за трагедијата.

Од друга страна, Обвинителството најавува силни докази. Според нив, дискотеката била „смртоносна стапица“, а пожарот бил резултат на сериозна негрижа и институционални пропусти.

Кочани ноќеска не спиеше

Точно една година по трагедијата, Кочани и Македонија синоќа не спиеја.

Во пресрет на годишнината, граѓаните се собраа во тишина и молитва за да им оддадат почит на 63-те млади кои ги загубија животите.

Под организација на здружението „16-ти март“, бдеењето почна во 02:15 часот по полноќ пред урнатините на поранешната дискотека.

Стотици граѓани, пријатели и членови на семејствата на настраданите дојдоа со свеќи и цвеќе. Така, во тишина и болка, испратија порака дека жртвите нема да бидат заборавени.

Молк во 02:32 часот

Најемотивниот момент од собирот се случи во 02:32 часот. Тоа е моментот кога пред една година избувна пожарот.

Во тој миг, градот замолкна. Со едноминутен молк им беше оддадена почит на загинатите.

Таа тишина беше најсилниот потсетник на загубата што Кочани и Македонија сè уште ја носат.

Последиците и понатаму се чувствуваат

Една година по трагедијата, дел од повредените и натаму се лекуваат. Тие сè уште се соочуваат со последиците од пожарот.

Министерството за здравство најави дека подготвува решение со кое повредените ќе бидат ослободени од плаќање партиципација за здравствени услуги.

Сепак, и покрај овие чекори, трагедијата во „Пулс“ останува симбол на огромна генерациска загуба.

За само неколку минути згаснаа 63 млади животи. А една година подоцна, Македонија сè уште го поставува истото прашање, дали правдата конечно ќе ја затвори најболната страница од оваа трагедија.