Ја претепал девојката до бессознание во автомобил, па ја исфрлил од кола пред маркет – полицијата го приведе 31-годишниот насилник
15/11/2026 16:48
Насилство врз девојка во Охрид е пријавено рано утринава, по што полицијата лишила од слобода 31-годишен охриѓанец.
Според официјалната информација од СВР Охрид, денеска, 15 ноември, во 05:05 часот полициски службеници го привеле Х.К.(31) од Охрид, постапувајќи по претходна пријава дека физички ја нападнал својата девојка.
Неофицијално: Ја тепал во автомобил додека не се онесвестила
Повеќе вознемирувачки детали за случајот објави „Курир“, повикувајќи се на свои извори.
Според неофицијалните информации на порталот, нападот се случил во автомобил, каде 31-годишникот наводно ја тепал девојката сè додека таа не паднала во бессознание.
Наводно, ниту тогаш не запрел веднаш, туку продолжил да се движи со автомобилот низ Охрид додека девојката била без свест.
Овие детали засега не се содржани во официјалното соопштение на полицијата.
Наводно ја исфрлил од автомобил кога се освестила
Според истиот извор, откако девојката повторно се освестила, осомничениот го запрел возилото во близина на маркет и ја исфрлил надвор.
Од СВР Охрид засега официјално потврдуваат дека станува збор за пријавен физички напад врз девојка и дека Х.К. е лишен од слобода.
„Денеска (15.11.2026) во 05:05 часот во Охрид, полициски службеници од СВР Охрид го лишија од слобода Х.К.(31) од Охрид, постапувајќи по претходна пријава дека физички ја нападнал неговата девојка“, изјави портпаролот на СВР Охрид, Стефан Димоски.
Дополнителни официјални информации за здравствената состојба на девојката и за околностите под кои се случил нападот засега не се соопштени.
Случајот со насилство врз девојка во Охрид дополнително ќе се расчистува, по што се очекува да биде познато и каква пријава ќе биде поднесена против приведениот.




![Повеќе случаи на семејно насилство и физички напади во Охрид, Крушево, Велес и Скопје semejno-nasilstvo[1]](https://mkinformer.com/wp-content/uploads/2021/05/semejno-nasilstvo1.jpg)