ЗАРОБЕНИ ВО ВСЕЛЕНАТА – Сунита Вилијамс открива дека ја загубила основната телесна функција
02/02/2025 10:22
Астронаутката на НАСА, Сунита Вилијамс, открила дека изгубила способност да извршува некои основни функции по осум месеци поминати во вселената. Таа изјави дека заборавила како е да се оди откако поминала 234 дена во микро-гравитација.
„Тука сум доволно долго и сега се обидувам да се сетам како е да се оди. Не сум одела, не сум седела, не сум лежела,“ изјави таа за време на видео повик со ученици од едно средно училиште во Нидам, Масачусетс.
Вилијамс (59) и нејзиниот колега Бери Вилмор (62) требало да бидат на Меѓународната вселенска станица (ISS) само осум дена, но поради технички проблеми на капсулата на компанијата Боинг која ги пренела, нивниот престој се продолжил. Капсулата се вратила на Земјата без астронаутите, оставајќи ги на ISS до крајот на март, кога ќе можат да се вратат со леталото Crew-9 на SpaceX.
Американскиот претседател Доналд Трамп изјави дека администрацијата на Бајден се откажала од „двајца храбри астронаути“ и побара од Илон Маск и SpaceX да „одат да ги земат“.
„Илон наскоро ќе замине. Се надевам дека сè ќе биде безбедно,“ изјави Трамп. „Среќно Илон!!!“ Трамп исто така вети дека ќе се погрижи за враќање на Вилмор и Вилијамс што е можно поскоро.
Претходно, НАСА соопшти дека Crew-9 ќе се врати дома во февруари, но мисјата беше одложена во декември. Официјалните лица објаснија дека SpaceX треба повеќе време за да ја заврши работата на капсулата Crew-10, која треба да биде лансирана до ISS пред да може Crew-9 да ја напушти станицата. Така, враќањето на астронаутите е планирано за крајот на март.
Во текот на долгорочните вселенски мисии, микрогравитацијата има сериозен ефект врз телата на астронаутите, што резултира со значително ослабување на мускулите и коските. Според НАСА, за секој месец во вселената, густината на коските на астронаутите се намалува за околу еден процент, ако не преземат соодветни мерки за да го спречат ова.
Мускулите, кои на Земјата редовно се активираат со едноставни движења, исто така ослабуваат, бидејќи не мора да работат толку напорно во услови на микрогравитација.
По враќањето од долготрајните мисии, не е невообичаено астронаутите да не можат веднаш да се движат како порано. Ако Вилмор и Вилијамс се вратат кон крајот на март, како што е планирано, ќе поминат вкупно десет месеци на ISS, што е два месеци повеќе од стандардната долгорочна мисија.
