Фон дер Лајен: ЕУ е подготвена за контрамерки против американските царини
06/04/2025 18:36
Европската унија е подготвена да се брани од новите тарифи што ги воведе американскиот претседател Доналд Трамп, со пропорционални контрамерки, изјави претседателката на Европската комисија, Урсула фон дер Лајен. Во денешниот телефонски разговор со британскиот премиер Кир Стармер, Фон дер Лајен најави дека ЕУ ќе работи со своите партнери за да ја постигне оваа цел.
Таа истакна дека 27-те земји-членки на ЕУ остануваат посветени на тесна соработка со Велика Британија во областа на безбедноста и одбраната. Истовремено, Фон дер Лајен изрази загриженост за Русија, која, според неа, ги попречува мировните напори во Украина.
Претседателката на Европската комисија, исто така, најави дека на 24 април ќе се сретне со премиерот Стармер во Лондон по повод Меѓународниот самит за енергетска безбедност.
Во саботата стапија на сила новите основни царини од 10% за целиот увоз во САД. На средината на оваа недела, земјите-членки на ЕУ се очекува да гласаат за контрамерки на американските царини, особено за челик и алуминиум.
