Галичка свадба 2025“ – Во Галичник традиционално зурли и тапани за Петровден
04/07/2025 19:46
Од 11 до 13 јули, повторно ќе се одржи „Галичка свадба“, годинешните младоженци се Јован Филипоски, потомок на галичкото семејство Филипоски, и Лилјана Михајлоска, кои велат дека учеството во свадбата е исполнување на животен сон.
Тродневната програма ќе започне во петок, 11 јули, со монодрама на мијачки дијалект посветена на 150 години од издавањето на Тријазичникот на Ѓорѓија Пулески, а ќе продолжи со современа музичка програма за помладите посетители.
Свадбарските обичаи ќе започнат во сабота со традиционалниот пречек на тапаните, китење на бајракот, изведба на свекрвиното оро и настап на ансамблот „Танец“ со ората „Невестинското“ и „Тешкото“. Во недела ќе се одржат обичаите „бричење на зетот“, „тргнување по невеста“ и венчавање во црквата „Св. Апостоли Петар и Павле“.
Манифестацијата и годинава ја поддржуваат Пивара Скопје и СКОПСКО, како и Претседателката Гордана Сиљановска-Давкова и Министерството за култура и туризам.
Ќе биде воведен и посебен сообраќаен режим во Галичник за време на настанот, а ќе има и апел за одговорно однесување кон животната средина и умерено консумирање алкохол.
Дел од содржините ќе бидат емитувани во живо на социјалните мрежи, за сите кои нема да можат да присуствуваат.
Од 11 до 13 јули, повторно ќе се одржи „Галичка свадба“, годинешните младоженци се Јован Филипоски, потомок на галичкото семејство Филипоски, и Лилјана Михајлоска, кои велат дека учеството во свадбата е исполнување на животен сон.
