Европскиот автомобилски пазар расте, Volkswagen омилен, Tesla во пад – BYD со рекордна експанзија во 2025
01/12/2025 14:16
Европскиот автомобилски пазар продолжува постепено да закрепнува – регистрациите на нови патнички автомобили во Европската Унија во октомври се зголемија за 1,4% според најновите податоци на ACEA. Овој тренд претставува четврто последователно зголемување и шести раст во последните седум месеци, иако продажбата сè уште не го достигнала нивото пред пандемијата.
Во првите десет месеци од 2025 година, електричните возила на батерии остварија пазарен удел од 16,4%, што претставува напредок, но сепак е под темпото неопходно за европските климатски цели. Најбаран избор кај купувачите остануваат хибридно-електричните модели, додека plug-in хибридите бележат значаен раст во однос на минатата година.
▶️ Пад на бензин и дизел, раст на хибриди и plug-in модели
Пазарниот удел на автомобили со бензински и дизел мотор продолжи да се намалува и во 2025, па така нивниот комбиниран удел падна на 36,6%. Продажбата на plug-in хибриди порасна за 75%, а класичните хибриди за 31,5%, што е најсилен раст во последните години.
Иако бензинците и понатаму се најпродавани (29.236 регистрации), хибридите со 19.729 регистрации далеку го надминуваат дизел сегментот, кој падна на 8.739 возила.
▶️ BYD експлодира, Tesla во слободен пад
Најголем пресврт се случува во сегментот на електрични возила. Продажбата на Tesla во ЕУ потона за 39,2% во првите десет месеци, со пад на пазарниот удел од 2,2% на 1,3%. Само во октомври, Tesla регистрираше речиси двојно помал број возила отколку претходната година.
Во исто време, кинескиот гигант BYD бележи неверојатен раст од 239,6%, иако сè уште е под Tesla во вкупни регистрации. BYD порасна од 0,3% на 1% пазарен удел и според аналитичарите може да ја престигне Tesla уште во првата половина од 2026 година.
Кога се додаваат и податоците од Велика Британија, Норвешка, Исланд и Швајцарија, падот на Tesla е нешто помал (-29,6%), но BYD таму исто така бележи раст од скоро 285%.
▶️ Volkswagen и понатаму доминира во ЕУ
Volkswagen групацијата останува најсилна на европскиот пазар со 27,6% удел, по што следат Stellantis (15,8%), Renault (11,3%) и Hyundai (7,5%). Кај брендовите, Volkswagen, Škoda и Toyota се најбарани, додека Cupra, Alfa Romeo и MG (SAIC Motor) имаат најголем раст.
▶️ ACEA предупредува: климатските цели за 2030 и 2035 се недостижни
И покрај напредокот, ACEA посочува дека електрификацијата не се одвива доволно брзо за остварување на строгите европски цели за намалување на CO2 емисиите. Причината е бавниот развој на инфраструктурата, недоволно стимулирање на купувачите и високата цена на електричните автомобили.
Од 2025 година целната вредност е 93,6 g CO2/km, додека просечните емисии на новите возила во 2023–2024 година изнесуваат околу 108 g/km – далеку над лимитот. Казната за секој грам над дозволеното е 95 евра по продадено возило, што може да донесе милијардски загуби за производителите.
Од 2035 година, пак, во ЕУ ќе биде дозволена продажба само на автомобили со нулта емисија, што значи дека бензинските и дизел возила стануваат историја.
Европскиот автомобилски пазар продолжува постепено да закрепнува – регистрациите на нови патнички автомобили во Европската Унија во октомври се зголемија за 1,4% според најновите податоци на ACEA. Овој тренд претставува четврто последователно зголемување и шести раст во последните седум месеци, иако продажбата сè уште не го достигнала нивото пред пандемијата.
