Спречен нелегален транспорт на оружје од Турција кон Македонија преку Бугарија

Нелегален транспорт на оружје од Турција кон Македонија, преку територијата на Бугарија, бил спречен ноќеска, во периодот меѓу 24 и 25 декември 2025 година, благодарение на координирана меѓународна полициска акција.

Како што информира Министерство за внатрешни работи, акцијата била реализирана од Единицата за недозволена трговија со оружје, опасни материи и радиоактивен материјал при Одделот за криминалистичка полиција, преку брза размена на информации и оперативна соработка со бугарските безбедносни служби.

Клучна улога во акцијата имала соработката преку SELEC Центар, како и со ГДБОП и Царинска агенција на Бугарија.

„Во текот на ноќта 24–25 декември 2025 година, по преземени координирани мерки и активности, на граничниот премин Капитан Андреево бил извршен претрес на товарно моторно возило марка ‘Волво’ со македонски регистарски таблички“, соопшти МВР.

При претресот на товарниот простор биле пронајдени и одземени:

• три пушки,

• 20 пиштоли,

• 5.750 куршуми.

Според првичните информации, оружјето било наменето за нелегален транспорт кон територијата на Македонија.

Од МВР информираат дека по целосно документирање на случајот, идентификација на сите инволвирани лица и утврдување на нивната улога, ќе биде поднесена соодветна кривична пријава.

Надлежните институции нагласуваат дека ваквите заеднички акции се клучни за сузбивање на организираниот криминал и нелегалната трговија со оружје во регионот.

Share on Facebook

Tweet

Follow us

Save