Путин го пофали Илон Маск: „Тој е вистински гениј“, Русија развива сопствен одговор на „Старлинк“

29/10/2026 6:27

Путин го пофали Илон Маск и го нарече „вистински гениј“, додека Русија се обидува да развие сопствен сателитски интернет систем по моделот на „Старлинк“.

Рускиот претседател изјавата ја даде за време на презентација на рускиот министер за дигитален развој Максут Шадајев, кој информирал дека Москва веќе лансирала повеќе од 30 сателити во рамки на проектот.

„Илон Маск е гениј, вистински гениј“

Путин нагласил дека Русија сè уште е на почеток во споредба со сателитската мрежа на компанијата „Спејс-икс“.

Според неговите зборови, Маск располага со повеќе од 5.000 активни сателити во ниска орбита, додека Русија допрва се обидува да го зголеми бројот на сопствени сателити.

„Илон Маск е гениј, вистински гениј“, изјавил Путин, додавајќи дека задачата на Русија сега е да премине „од квалитет кон квантитет“.

Русија сака сопствен „Старлинк“

„Старлинк“ функционира преку голем број сателити во ниска Земјина орбита, што овозможува побрза и постабилна интернет-комуникација во споредба со традиционалните геостационарни системи.

Русија веќе подолго време се обидува да развие сопствена мрежа со слична функција, и за цивилни и за безбедносни потреби.

Москва во контакт и со Маск

Путин откри и дека Москва одржува контакти со американски партнери, меѓу кои и со Илон Маск.

Според него, комуникацијата е важна за да не дојде до меѓусебно попречување на сателитските системи во орбитата и за да се одржува ред во вселената.

„Старлинк“ има клучна улога и во Украина

Изјавата на Путин е интересна и поради фактот што Украина во голема мера го користи „Старлинк“, како и воената варијанта „Старшилд“, за комуникација и операции со беспилотни летала.

Во последниот период Киев пријави и ограничувања во работата на системот, што според украинските власти влијаело врз дел од воените операции. Подоцна беше соопштено дека услугите повторно функционираат со полн капацитет.

Русија и претходно покажувала интерес за соработка со Маск

Ова не е првпат руски претставници позитивно да зборуваат за Маск.

Во 2025 година рускиот претседателски пратеник за инвестиции Кирил Дмитриев изјави дека Москва би сакала да соработува со него и на потенцијална мисија кон Марс.

Путин го пофали Илон Маск во момент кога Русија се обидува да го намали технолошкиот јаз во сателитските комуникации и да изгради сопствена мрежа што ќе може да му конкурира на „Старлинк“.