По дронски напад Катар го стопира производството на LNG
05/03/2026 10:49
Катар целосно го прекина процесот на втечнување на природен гас, а враќањето на редовното производство и извоз на течен природен гас (LNG) нема да биде можно најмалку еден месец, пренесува агенцијата Ројтерс, повикувајќи се на извори запознаени со ситуацијата.
Државната енергетска компанија QatarEnergy оваа недела го прекинала производството и прогласила виша сила за извозот, по дронските напади врз капацитетите во Ras Laffan Industrial City, најголемиот центар за преработка и извоз на гас во земјата.
Според изворите, по целосното запирање на постројките во Рас Лафан ќе бидат потребни најмалку две недели за повторно стартување на процесот на претворање на гасот во течна состојба. Дополнително, ќе поминат уште најмалку две недели за производството да достигне целосен капацитет.
Закани за глобалниот енергетски пазар
Прекинот доаѓа во период на зголемени геополитички тензии на Блискиот Исток и растечки ризици за безбедноста на енергетската инфраструктура и транспортните рути, вклучително и Ормускиот Теснец, кој е еден од најважните премини за глобалната трговија со енергенси.
Во 2025 година, речиси 90% од катарскиот извоз на течен природен гас бил насочен кон азиските пазари. Најголеми купувачи биле Кина и Индија, додека значајни клиенти се и Тајван и Јужна Кореја. Европската Унија останува трет најголем пазар за катарскиот гас, по САД и Норвешка.
Катар има долгорочни договори за снабдување со големи азиски компании, меѓу кои Sinopec, CNPC и индиската Petronet LNG.
Амбициозни планови за проширување
Паралелно со тековните предизвици, QatarEnergy работи на проширување на гасното поле North Field, со цел зголемување на годишниот производствен капацитет од 77 на 142 милиони тони LNG до 2030 година.
Аналитичарите предупредуваат дека подолг прекин на производството би можел дополнително да ја зголеми нестабилноста на глобалниот енергетски пазар и да изврши притисок врз цените на гасот, особено во Азија и Европа.
