Трамп сака нов лидер во Иран: „Имаме луѓе што би завршиле одлична работа“
06/03/2026 10:38
Американскиот претседател Доналд Трамп изјави дека поддржува целосна промена на раководството во Иран и откри дека веќе размислува за потенцијални кандидати кои би можеле да ја преземат власта.
Во ексклузивно интервју за NBC News, Трамп посочи дека неговата администрација има неколку имиња кои, според него, би биле соодветни за нов лидер на Иран. Тој додаде дека се преземаат и мерки за да се обезбеди безбедноста на тие лица во услови на актуелниот конфликт.
„Сакаме да влеземе и да исчистиме сè“, изјави Трамп во телефонски разговор, пренесе NBC News.
Во посебно интервју за порталот „Аксиос“, американскиот претседател нагласи дека смета дека треба да има улога во процесот на избор на следниот лидер на Иран.
„Сакаме да добијат добар лидер. Имаме неколку луѓе за кои мислам дека би биле одлични за работата“, рече Трамп, без да открие за кои личности станува збор.
На прашањето дали се преземаат чекори за заштита на тие потенцијални кандидати, тој кратко одговори: „Да, се грижиме за нивната безбедност“.
Коментарите на Трамп доаѓаат неколку дена по неговата изјава од минатата сабота кога, на прашањето кој би можел да го води Иран во иднина, одговори дека во одреден момент можеби ќе биде прашан кого би предложил за таа позиција. Подоцна додаде дека во изјавата имало и доза на сарказам.
Во интервјуто, Трамп се осврна и на неодамнешните изјави на иранскиот министер за надворешни работи Абас Аракчи. Тој претходно за NBC News изјави дека Иран е подготвен за можна копнена инвазија од страна на американските и израелските сили.
Американскиот претседател ги отфрли овие тврдења како неосновани и истакна дека во моментов не размислува за таков потег.
„Тоа е губење време. Тие изгубија сè, ја изгубија морнарицата и многу други капацитети“, изјави Трамп, додавајќи дека нападите ќе продолжат со исто темпо.
Иран во моментов се соочува со политичка неизвесност по смртта на врховниот лидер Али Хамнеи минатиот викенд. Во политичките кругови се споменува можноста неговиот син Моџтаба Хамнеи да го наследи.
Аналитичарите предупредуваат дека Исламската револуционерна гарда, која има силно воено, политичко и економско влијание во земјата, би можела дополнително да ја зацврсти својата позиција доколку го преживее актуелниот конфликт.
