Денеска се одбележуваат 23 години од убиството на Зоран Ѓинѓиќ, тогашен премиер на Србија, лидер на Демократската партија и една од клучните личности на Демократската опозиција на Србија.
Ѓинѓиќ беше убиен пред влезот на зградата на српската Влада на улицата Немањина, во период кога важеше за еден од највлијателните политичари во Србија.
Тој се издигна во самиот врв на српската политика по промените од 5 октомври 2000 година, кога падна режимот на Слободан Милошевиќ. Набрзо потоа, на 25 јануари 2001 година, ја презеде функцијата премиер на Србија.
Во периодот меѓу политичките промени и изборот на новата влада, Србија имаше преодна извршна власт, предводена од кабинетот на Миломир Миниќ, кој функционираше од 25 октомври 2000 до 25 јануари 2001 година.
По атентатот врз Ѓинѓиќ, српските власти ја спроведоа големата полициска акција „Сабја“, во која беа уапсени голем број лица, меѓу нив и припадници на специјалната полициска единица.
Според пресудата и наодите од истрагата, Милорад Улемек Легија, кој подоцна беше осуден на 40 години затвор, му наредил на Звездан Јовановиќ да го изврши убиството на Ѓинѓиќ. И Јовановиќ беше поврзан со единицата со која претходно раководел Легија.
Убиството на Зоран Ѓинѓиќ останува еден од најтешките и најзначајни политички настани во поновата историја на Србија, а и по повеќе од две децении продолжува да биде симбол на турбулентниот период низ кој минуваше земјата.
![toplo-vremeeeee-650x396[1]](https://mkinformer.com/wp-content/uploads/2021/06/toplo-vremeeeee-650x3961-1.jpg "Kлимaтoлoзитe co стpaшнa пpoгнoзa: Kлимaтa нa Балканoт ќe бидe yштe пoлoшa")
