Државата продава 71 говедо од кривопаланечкиот случај

92 заловени, 21 угинато – АХВ признава агресија и самоповредување

Државата ќе продаде 71 говедо од озлогласеното стадо што со години предизвикуваше хаос во Крива Паланка и околните села. Животните, кои слободно се движеле и размножувале во природа, ги уништувале нивите, предизвикувале страв кај жителите и отвориле бројни институционални препукувања.

Од Агенцијата за храна и ветеринарство (АХВ) за Фактор потврдуваат дека од 22 ноември 2025 година досега се заловени вкупно 92 говеда, но 21 од нив угинале по сместувањето во штала.

Во целосниот одговор на АХВ се наведува:

„Од вкупниот број одземени и заловени говеда, досега 21 говедо е угинато, од различна етиологија, најголемиот дел поради насилна смрт (самоповредување). Станува збор за животни кои досега не биле шталски чувани, односно живееле и се размножувале слободно, во природа. По нивното заловување и чување во затворен простор (штала), дел од говедата меѓусебно се повредуваат, изразувајќи агресивност, особено возрасните машки единки кон помалите.“

Трагичната судбина на подивените животни

Одговорот на АХВ отвора низа нови прашања:

• Какви биле условите во шталата?

• Дали животните биле соодветно раздвоени по возраст и пол?

• Зошто јавноста не била навремено информирана за 21 угинато говедо?

Најголемиот дел од угинувањата се случиле поради меѓусебна агресија и повреди, откако животните навикнати на целосна слобода биле затворени во ограничен простор.

Поединечна продажба преку електронско наддавање

Според владината одлука донесена на 21 април, станува збор за живи говеда во државна сопственост, чиј корисник е АХВ.

Вкупната почетна вредност на сите 71 грло изнесува околу 51,5 илјади евра (3.166.450 денари).

Продажбата ќе се изврши поединечно, преку електронско јавно наддавање на системот на Министерството за финансии, односно Управата за имотно-правни работи.

Од Министерството за финансии велат дека Управата само управува со системот, додека конкретната продажба е во надлежност на комисијата што ќе ги објави огласот, датумот и условите за лицитација.

Кој може да учествува?

Се уште не е познато дали купувачите ќе можат да наддаваат за едно, повеќе или за сите говеда. Деталите треба да бидат објавени преку огласот на надлежната комисија.

Раси, возрасти и цени

Од 71 говедо што оди на продажба:

• Женски: 48 (почетна вредност ~1,68 млн. ден.)

• Машки: 23 (почетна вредност ~1,49 млн. ден.)

Најскапо говедо: машко, мешавина, старо 3,5 години, 110.000 денари почетна цена
Најевтино: млади грла од 1,5 до 2 месеци, 12.000 денари

Години страв, штети и протести

Случајот со подивените говеда од Крива Паланка со години ги бранува локалните заедници. Жителите од повеќе села протестираа барајќи институционално решение, додека обвинувањата за тоа кој е надлежен за спречување на штетите и заловувањето се прелеваа од една во друга институција.

Случајот доби и кривично-правна димензија, по објавите дека службени лица на АХВ биле спречувани при заловување на дел од животните.

Останува да се види дали лицитацијата ќе ги реши долгогодишните проблеми на граѓаните од Крива Паланка или е само нова епизода во оваа необична сага.