11години од тероризмот во „Диво насеље“, Куманово се сеќава на загинатите херои

09/05/2026 14:27

11 години од престрелката во „Диво насеље“: Куманово со почит се сеќава на осумте загинати херои

Трагичниот датум што го промени Куманово

Денеска се навршуваат 11 години од вооружената престрелка во кумановско „Диво насеље“. На 9 и 10 мај 2015 година, во 28-часовните престрелки, животот го загубија осум припадници на безбедносните сили.

Загинатите херои на Македонија се:

Љубиша Аранѓеловиќ
Бобан Ивановиќ
Горан Илијевски
Жарко Кузмановски
Исамедин Османи
Сашо Самојловски
Ненад Серафимовски
Горан Стојменовиќ

Сите осум посмртно се одликувани со ордени за храброст. Во престрелката беа повредени уште 37 припадници на безбедносните сили.

Трајни споменици во нивна чест

Во кругот на СВР Куманово беше откриена спомен-плоча во чест на загинатите полициски службеници.

Во централното подрачје на Куманово, хероите добија и мурал со натпис „Хероите живеат вечно“.

Ден на сеќавање, Прв дел (9 мај)

Во организација на синдикалната организација на Синдикатот на полицијата на Македонија (СПМ) при СВР Куманово, денот на сеќавање ќе започне со:

Панихида во Соборниот храм „Свети Никола“, оддавање почит за загинатите
Полагање цвеќе пред спомен-обележјето во кругот на СВР Куманово
Меморијален турнир во мал фудбал под мотото „Хероите живеат вечно“ во 12:30 часот во спортската сала на СОУ „Перо Наков“

Во рамки на турнирот ќе биде спроведена и хуманитарна акција за поддршка на полициски службеник.

Ден на сеќавање, Втор дел (10 мај)

Активностите продолжуваат и во недела, кога во организација на Патриотско друштво ќе се одржи 11. Меморијален велосипедски круг.

Сеќавање на деновите на страв

Два дена Куманово живееше во страв и неизвесност. Во густо населената населба „Тоде Мендол“ (позната како „Диво насеље“) одекнуваа престрелки со различен интензитет.

Населбата беше целосно блокирана од безбедносните сили, жителите ги напуштија своите домови, а хеликоптери постојано го надлетуваа градот.