Мицкоски: Договорот за „Стратешка соработка“ со Хрватска овозможува уште поголема економска соработка

26/05/2026 18:08

Македонија и Хрватска во моментов имаат избалансирани економски односи, а постои сериозен простор таа соработка дополнително да се продлабочи во периодот што следува. Ова го истакна премиерот Христијан Мицкоски на заедничката прес-конференција со неговиот хрватски колега Андреј Пленковиќ.

Трговската размена е во благ плус

Одговарајќи на новинарско прашање, Мицкоски рече дека во 2025 година Македонија е во благ плус од околу 10 милиони евра во трговската размена со Хрватска.

Според него, тоа е добар показател, но и основа за уште поголем раст во иднина.

Тој нагласи дека договорот за стратешка соработка отвора нови механизми и можности за унапредување на економските врски меѓу двете држави.

Важна одлука за македонските транспортери

Како особено значајна, Мицкоски ја издвои одлуката на хрватскиот Сабор, со која на македонските транспортери им се овозможуваат долгорочни визи.

Тој оцени дека ова е позитивен и важен пример за поддршка на македонската бизнис-заедница и за олеснување на деловната комуникација меѓу двете земји.

Соработка и во енергетиката

Премиерот се осврна и на енергетските проекти, посочувајќи дека хрватската компанија „Далековод“ е избрана за рестартирање на работите за високонапонското поврзување со Албанија.

Според него, тоа е уште еден доказ за блиската соработка меѓу Скопје и Загреб.

Очекува повеќе идеи од бизнис-заедницата

Мицкоски порача дека ваквите билатерални средби се силен поттик и за бизнис-круговите да размислуваат поотворено и покреативно за нови заеднички проекти.

Тој потсети дека неговата прва посета како премиер била токму на Хрватска, додека посетата на Пленковиќ во Охрид ја оцени како дополнителна инспирација за продлабочување на економската соработка.

Премиерот изрази очекување дека на заедничката средба ќе се слушнат нови идеи и конкретни можности за зголемување на билатералната економска размена.