Мицкоски: Некои маркети ги зголемиле маржите од 10 на 12-15 отсто, тоа нема да се толерира
03/07/2026 15:31
Контролите на Државниот пазарен инспекторат покажале дека кај одредени маркети има зголемување на бруто маржите во јуни годинава, во споредба со истиот месец минатата година.
Премиерот Христијан Мицкоски денеска изјави дека кај дел од маркетите е нотирано зголемување на бруто маржата од 2 до 5 процентни поени.
Како пример, тој посочи дека ако минатата година во јуни бруто маржата била 10 отсто, сега кај одредени маркети таа изнесува 12 или 15 отсто.
Мицкоски најави состанок со маркетите
По промоцијата на нова воена опрема во касарната „Илинден“, Мицкоски рече дека маркетите кај кои било утврдено вакво зголемување ќе бидат повикани на состанок.
Тој најави дека ќе им биде испратена јасна порака дека ваквото однесување нема да се толерира.
„Во одредени маркети нотирано е зголемување на бруто маржата споредена со минатата година од 2 до 5%. Тие ќе бидат повикани на состанок и јасно ќе им се каже дека тоа е недозволиво“, изјави Мицкоски.
„Тоа нема да го толерираме“
Премиерот наведе дека зголемувањето на маржите директно влијае врз цените и врз инфлацијата.
„Да бидам конкретен со пример: ако минатата година во месец јуни бруто маржата била 10%, сега е 12 или 15%. Тоа се тие дополнителни 2 до 5%. Тоа ние нема да го толерираме и многу јасна порака ќе испратиме кон тие“, рече Мицкоски.
Според него, доколку тие дополнителни 2 до 5 проценти се намалат, земјата би имала значително пониска инфлација.
Очекува стабилизирање на инфлацијата
Мицкоски рече дека очекува стабилизирање на инфлацијата во јуни, со многу помала вредност во споредба со мај и април.
Тој додаде дека за околу една недела треба да бидат објавени новите параметри, врз основа на бројките што ги добива од Државниот пазарен инспекторат.
„Кога би се намалиле тие 2 до 5%, тогаш практично ние би биле земја со најниска инфлација во Европа во овој момент“, изјави премиерот.
Контролите на Државниот пазарен инспекторат покажале дека кај одредени маркети има зголемување на бруто маржите во јуни годинава, во споредба со истиот месец минатата година.
