Владата бара ново задолжување од 25 милиони евра, а од претходните 20 милиони не искористила ни 800.000

Владата бара од Собранието да одобри ново задолжување од 25 милиони евра кај Светска банка, иако од претходниот кредит од 20 милиони евра досега не биле искористени ни 800.000 евра.

Новиот заем е наменет за реформи во управувањето со јавните финансии, даночната администрација и дигитализацијата на државните институции.

Истовремено, Владата предлага да се откажат преостанатите 19,2 милиони евра од стариот кредит и да се заменат со нова кредитна линија.

Од 20 милиони евра искористени помалку од 800.000

Претходниот заем бил одобрен во 2022 година за проектот за воспоставување интегриран систем за управување со јавните финансии – ИФМИС.

Од вкупно одобрените 20 милиони евра, досега биле повлечени помалку од 800.000 евра.

Владата предлага неискористениот дел од 19,2 милиони евра да биде откажан. Проектот треба да биде затворен на 30 септември 2026 година, една година порано од предвиденото.

Стариот кредит ќе се замени со нов заем

Наместо досегашниот модел на финансирање, Владата планира да премине кон нов инструмент на Светска банка наречен „Програма за резултати“.

Според овој модел, најголемиот дел од средствата нема да се исплаќа однапред, туку откако државата ќе исполни конкретни реформски цели.

Од новиот заем, 23 милиони евра ќе зависат од исполнувањето на однапред утврдени индикатори.

Преостанатите два милиони евра ќе се користат за техничка поддршка, институционални капацитети и управување со програмата.

Пари за реформи во институциите

Со новото задолжување треба да се модернизираат системите за буџетирање, сметководство, државна помош и даночна администрација.

Во реализацијата ќе бидат вклучени Министерството за финансии, Управата за јавни приходи и Министерството за дигитална трансформација.

Државниот завод за ревизија ќе проверува дали институциите ги исполниле условите за повлекување на средствата.

Отплата во рок од 12 години

Заемот ќе се отплаќа во рок од 12 години, со тригодишен грејс-период.

Каматната стапка ќе биде поврзана со шестмесечниот ЕУРИБОР, со дополнителен варијабилен распон.

Отплатата е предвидено да се врши во 18 полугодишни рати, со доспевање на 15 јануари и 15 јули.

Државата ќе плати еднократна провизија од 0,25 проценти од износот на заемот. Ќе се пресметува и годишна провизија од 0,25 проценти на неповлечениот дел од кредитот.

Владата бара скратена постапка

Министерството за финансии до Собранието доставило два предлог-закони.

Со едниот се менува постојниот Закон за задолжување, а со другиот се одобрува новиот кредит од 25 милиони евра.

За двата предлога се бара скратена постапка, бидејќи нивното усвојување е услов за потпишување на новиот договор со Светска банка и за откажување на неискористениот дел од стариот заем.