Рекордни над 31 милион евра собрани од патарини за шест месеци

20/08/2026 11:21

Рекордни приходи од патарини се остварени во првите шест месеци од годинава, информираат од Јавното претпријатие за државни патишта.

Од почетокот на годината до крајот на јуни биле наплатени 1.919.775.277 денари, односно повеќе од 31 милион евра.

Во споредба со истиот период минатата година, наплатени се 21.891.532 денари повеќе.

Според бројот на возила, најфреквентна наплатна станица е Тетово.

Потоа следуваат Петровец, Романовце, Глумово, Миладиновци, Желино и Гостивар.

На листата се и Стоби, Кадрифаково, Преод, Сопот, Демир Капија, Отовица и Гевгелија.

Според приходите и висината на патарината, најголем промет има на Романовце.

Потоа следуваат Миладиновци, Петровец, Глумово, Желино и Тетово.

По нив се Стоби, Преод, Гостивар, Сопот, Гевгелија, Кадрифаково, Отовица и Демир Капија.

Од ЈПДП велат дека при зголемен сообраќај, особено во летниот период, се пуштаат сите расположливи ленти.

Посебен приоритет се дава на електронската наплата преку MTag и MCard.

Учеството на електронската наплата изнесува 36 проценти на 11 наплатни станици каде што е воведена.

Од претпријатието посочуваат дека електронската наплата е зголемена за шест проценти.

Од мај годинава MTag уредите може да се купат и во продажната мрежа на „Македонски телеком“ и „А1 Македонија“.

Претходно тие беа достапни само преку ЈПДП и на наплатната станица Петровец.

Од ЈПДП претходно најавија и дека се разгледува можноста за воведување затворен систем за наплата на патарина.

Таквиот модел би се темелел на наплата според поминати километри, слично на системот во Србија.

За таа цел веќе се подготвува студија за Коридорот 8.

Минатата година, заклучно со 23 декември, од патарини биле собрани 4.158.914.362 денари, односно околу 67,6 милиони евра.

Со тоа, рекордни приходи од патарини се бележат и во првата половина од оваа година.